धारापानी महिला समूहको तीज गीतमार्फत तीनधाराको संरक्षण सन्देश

चितवन । भरतपुर महानगरपालिका–४ अन्तर्गत धारापानी टोलमा रहेको ऐतिहासिक तीनधाराको संरक्षण, प्रवर्द्धन र प्रचार प्रसार गर्ने उद्देश्यले धारापानी महिला समूहले तीज गीतको माध्यमबाट सन्देशमूलक सांस्कृतिक प्रस्तुति दिएका छन्।

तीनधाराको चौतारीमा आयोजित कार्यक्रममा करिब ४० जना महिला सदस्यहरुले संयुक्त रुपमा तीज गीत गाएर तीनधाराको ऐतिहासिकता, सांस्कृतिक महत्व र संरक्षणको आवश्यकता प्रस्तुत गरेका हुन्। कार्यक्रममा छिमेकी टोलवासी, विभिन्न संघ-संस्थाका प्रतिनिधि तथा स्थानीयवासीको उल्लेखनीय उपस्थिति रहेको थियो।

महिला समूहले तयार पारेको गीतमा तीनधाराको उत्पत्ति, पुराना पुस्ताहरुको योगदान, वर्तमान पुस्ताको जिम्मेवारी, पर्यावरणीय सन्देश, स्थानीय एकता र विकास योजनासँगको समन्वयलाई सुन्दर लयमा प्रस्तुत गरीएको छ। गीतको शब्द संयोजन समूहकी सह-सचिव गीता शर्माले गरेकी हुन्।

उनका अनुसार धारापानी टोल विकास संस्था अन्तर्गत रहेको यस प्राकृतिक पानीको मुहान साविक वडा नं ५ अन्तर्गतको समयदेखि नै स्थानीय पुस्ताको सतत संरक्षणमा अडिएको छ। तीज गीतको माध्यमबाट अब यसको प्रचार-प्रसार गर्दै भविष्यमा यस क्षेत्रलाई पर्यटकीय गन्तव्य बनाउने लक्ष्य लिइएको हो।

गीतमा धारापानी मूल संरक्षण समिति, धारापानी टोल विकास संस्था, हालको उपभोवता समिति, वडा कार्यालय, प्रदेश, महानगरपालिका, वे ग्रुप, ग्रुप फर सोसलको योगदानप्रति कृतज्ञता प्रकट गरिएको छ

गीतको अन्तिम हरफमा धारापानी महिला समूहले सबैलाई संरक्षणमा हातेमालो गर्न आग्रह गर्दै टोल भ्रमणका लागि आमन्त्रण गरेका छन्।