चितवन । चितवनका युवाहरूलाई स्वास्थ्य क्षेत्रमा दक्ष बनाउँदै स्वदेश तथा विदेशमा रोजगारीका नयाँ अवसरहरू सिर्जना गर्ने उद्देश्यले ‘सिटी एज्ड केयर ट्रेनिङ एण्ड रिसर्च सेन्टर’ औपचारिक रूपमा सञ्चालनमा आएको छ। नारायणगढको लायन्सचोकस्थित केन्द्रको सोमबार एक कार्यक्रमका बीच उद्घाटन गरिएको हो।
घरायसी र सहज वातावरणमा गुणस्तरीय तालिम प्रदान गरी दक्ष जनशक्ति उत्पादन गर्ने लक्ष्यसहित स्थापना गरिएको सो केन्द्रको प्रमुख कार्यकारी अधिकृत सुवाष खड्काका अनुसार पछिल्ला वर्षहरूमा नेपालमा केयर गिभर पेशाप्रति युवाहरूको आकर्षण बढ्दो छ।
“काठमाडौँस्थित मुख्य कार्यालयबाट हालसम्म ५ हजारभन्दा बढी प्रशिक्षार्थीलाई व्यावसायिक तालिम दिइसकेका छौं,” खड्काले भने, “यहाँबाट तालिम लिएका अधिकांश प्रशिक्षार्थीहरू विदेशमा रोजगारी गरिरहेका छन्। बेलायतस्थित सीपीडिएसओ बाट मान्यता प्राप्त भएकाले अन्तर्राष्ट्रिय मापदण्डअनुसार तालिम सञ्चालन हुँदै आएको छ।”
चितवन शाखाका प्रमुख ज्ञानबहादुर अधिकारीका अनुसार हाल काठमाडौँ, इटहरी र चितवनमा फ्रेन्चाइजमार्फत तालिम सञ्चालन भइरहेको छ। उनले प्रत्यक्ष कक्षा तथा अनलाइन दुवै माध्यमबाट तालिम लिने व्यवस्था गरिएको जानकारी दिए।
तालिम अवधि ३९० घण्टादेखि १,२०० घण्टासम्मको हुनेछ। कक्षा ८ उत्तीर्ण गरेका व्यक्तिहरू सिटिभिटीको बेसिक कोर्समा सहभागी हुन सक्नेछन्। जुन सर्टिफिकेटले इजरायललगायत देशहरूमा जी–टु–जी कार्यक्रममार्फत रोजगारीको अवसर खुलाउनेछ। युरोप, अमेरिका लगायतका मुलुकमा जान चाहनेहरूको हकमा कक्षा १२ उत्तीर्ण अनिवार्य गरिएको छ, जसलाई लक्षित गरी सीपीडिएसओको एडभान्स कोर्स उपलब्ध गराइनेछ।
चितवन शाखाका बजार प्रवद्र्धन प्रमुख सुसिल भट्टराईले स्वास्थ्य क्षेत्रमा दक्ष जनशक्ति उत्पादन गर्ने यस्ता तालिम केन्द्रहरू अहिलेको आवश्यकता भएको बताए। “चितवन जस्तो शहरीकरण तीव्र रूपमा बढिरहेको जिल्लामा यस्ता व्यावसायिक तालिमहरू अनिवार्यजस्तै छन्,” उनले भने, “यस्ता केन्द्रहरूले वृद्धजन, अपांगता भएका व्यक्ति र स्वास्थ्य सेवा क्षेत्रमा आवश्यक दक्ष जनशक्ति उत्पादनमा योगदान पुर्याउनुका साथै विदेश रोजगारीमा जान चाहने युवाहरूलाई पनि आवश्यक सीप र ज्ञान प्रदान गर्छन्।”
कार्यक्रमको उद्घाटन गर्दै भरतपुर महानगरपालिका वडा नं २ का अध्यक्ष मनोज रानाभाटले यस्ता तालिम केन्द्रहरूले विदेश जाने युवालाई रोजगारीका लागि तयारी गराउन महत्वपूर्ण भूमिका खेल्ने विश्वास व्यक्त गरे। “नेपालबाट जाने धेरै युवा स्वास्थ्य क्षेत्रको रोजगारीमा आकर्षित छन्,” उनले भने, “यसले उनीहरूलाई अन्तर्राष्ट्रिय स्तरमा प्रतिस्पर्धी बन्न सहयोग गर्नेछ। वडा कार्यालयबाट आवश्यक सहयोग उपलब्ध गराइनेछ।”
केन्द्र स्थापना भएको उपलक्ष्यमा मानव सेवा आश्रममा आश्रित वृद्धवृद्धाहरूलाई खाना खुवाउने कार्यक्रमसमेत सम्पन्न गरिएको थियो। विदेश रोजगारीका सम्भावनासँगै चितवनमा नयाँ आशा पलाएको यस केन्द्रले वृद्धाश्रम, अपांगता भएका व्यक्ति र स्वास्थ्य सेवा क्षेत्रमा समेत दक्ष जनशक्ति उत्पादन गर्दै लैजाने अपेक्षा गरिएको छ।
