चितवन । भरतपुरस्थित चितवन एक्स्पो सेन्टरमा जारी स्वदेशी जुत्ता चप्पल मेलामा नयाँ वर्षको अवसरमा एकैदिन १० हजार बढी दर्शकले अवलोकन गरेका छन् ।
२०८१ चैत १४ गतेदेखि सुरू भएको चौंथो चितवन स्वदेशी जुत्ताचप्पल प्रवर्द्धन तथा व्यापार मेलामा जुत्ताचप्पल किन्ने ग्राहकको भीडभाड लागेको हो ।
भरतपुर–१२ बाट परिवारको साथमा जुत्ताचप्पल किन्न आएका ईश्वर घिमिरेले सुपथ मूल्यमा गुणस्तरीय जुत्ताचप्पल त्यसमा पनि थप छूट पाएपछि ५ जोर जुत्ता एकैपटक लिएको बताए ।
उनले यसअघिको मेलाहरुमा आएर जुत्ताचप्पल लैजाने गरेको बताउँदै आफ्नो देशमा उत्पादन हुने स्वदेशी जुत्ताचप्पल सबैले प्रयोग गर्नुपर्ने धारणासमेत व्यक्त गरे ।
मेलामा प्रत्येक जुत्ताचप्पल खरिदमा १५ देखि ५० प्रतिशतसम्म छूटको व्यवस्था गरिँदै आएको छ । साथै ग्राहकहरुले नयाँ वर्ष २०८२ को अवसरमा नयाँ जुत्ताचप्पल प्रयोग गरुन् र जुत्ताचप्पल खरिद गर्न आइसकेपछि खाली फर्किन नपरोस् भन्ने उद्देश्यका साथ थप छूटको व्यवस्था गरिएको हो ।
यस्तै, नयाँ शैक्षिक सत्रसँगै विद्यार्थीहरुलाई पहिला दिँदै आएको छूटमा थप १० प्रतिशत छूटको व्यवस्था गरिएको नेपाली जुत्ताघरका अध्यक्ष होमनाथ उपाध्यायले जानकारी दिए । यसका लागि भने विद्यार्थीहरुले आफ्नो आइडी कार्ड ल्याउनुपर्ने छ ।
उनले भने, ‘१५ देखि ५० प्रतिशत छूट मेलामा आउने सबैले पाउँछन्, नयाँ शैक्षिक सत्रमा विद्यार्थीहरुलाई लक्षितगरी हामीले थप १० प्रतिशत जोडेर २५ देखि ६० प्रतिशतसम्म छूटको व्यवस्था गरेका हौँ ।’ यसले गर्दा पनि ग्राहकहरुको भीड लागेको उनले बताए ।
चितवन उद्योग संघ र नेपाली जुत्ताघरको संयुक्त आयोजनामा सुरू भएको चौथो चितवन फुटवेयर एक्स्पो चितवन जुत्ताचप्पल मेलामा चितवनसंगै नवलपरासी, हेटौँडा धादिङ्ग, गोरखा, तनहुँलगायतबाट अवलोकनकर्ताहरु आउने गरेका छन् ।
२०८२ वैशाख १० गतेसम्म सञ्चालन हुने मेलामा ६ वटा स्वदेशी उद्योगबाट उत्पादित एक हजारभन्दा बढी प्रकारका जुत्ताचप्पल राखिएका छन् ।
मेलामा पार्टी सुज, स्कुलका जुत्ता, स्पोर्ट सुज, बिएफ डियरहिल सुज, फस्र्ट वाक सुज, शिखर सुज, रन सुज, स्मार्ट सुज, सुल्यान्ड सुज तथा छालाबाट उत्पादित सामग्री उपलब्ध रहेका छन् ।
करिब एक महिनासम्म सञ्चालन हुने मेलामा एक करोड ५० लाख रुपैयाँको कारोबार हुने अपेक्षा गरिएको छ । मेलामा ३० भन्दा बढी स्टल राखिएको छ ।
